Bajram Rexhepi: Tetova nuk mund të ndërtohet me refuzime dhe hipokrizi politike
Nënkryetari i Bashkimit Demokratik për Integrim (BDI), Bajram Rexhepi, ka reaguar ashpër ndaj refuzimit të propozim-amendamenteve të Frontit Europian nga koalicioni qeverisës VLEN-VMRO, të cilat parashikonin investime thelbësore për qytetin e Tetovës.
Sipas Rexhepit, janë refuzuar gjithsej 920 milionë denarë, që do të shkonin për tre projekte madhore: ndërtimi i Stadiumit të Qytetit, teleferiku drejt Kodrës së Diellit dhe restaurimi i Kalasë dhe Kompleksit Arabati Baba Teqe.
“Ky nuk është një veprim politik, por një goditje e drejtpërdrejtë ndaj së ardhmes së qytetit tonë. Refuzimi i këtyre projekteve dëmton sportin, turizmin, kulturën dhe ekonominë lokale”, deklaroi Rexhepi.
Ai theksoi se Tetova ka nevojë për zhvillim të barabartë dhe përfaqësues me integritet, që punojnë për qytetarët dhe jo për interesa të ngushta partiake.
“Ne nuk kemi më kohë për premtime boshe. Tetova meriton më shumë – zgjidhje konkrete dhe vizion të qartë për të ardhmen”, përfundoi Rexhepi.
