BDI-Çair: Nga “masterplan” për Çarshinë, në tender-skema me asfalt
Përfaqësuesja e Imrane Veliu Aliu ka akuzuar për mënyrën e realizimit të projektit të njohur si “masterplan” në Çarshinë e Vjetër të Shkupit, duke thënë se ai është degraduar në ndërhyrje minimale infrastrukturore, si zëvendësim i kalldrëmeve me asfalt.
Sipas saj, projekti që fillimisht ishte prezantuar si plan për ruajtjen dhe zhvillimin e identitetit të Çarshisë, ka përfunduar në një “improvizim” që cenon vlerat historike dhe kulturore të zonës.
Ajo ngriti dyshime edhe për procesin e përzgjedhjes së kompanisë realizuese, Lendi Grup, duke theksuar se bëhet fjalë për një kompani të themeluar në vitin 2024, e cila sipas saj ka filluar të fitojë tenderë publikë me vlera të larta menjëherë pas krijimit.
Veliu Aliu pretendoi se kompania ka fituar projekte në disa komuna të drejtuara nga VMRO-DPMNE dhe se në disa raste vlera e tenderëve përputhet pothuajse identikisht me ofertat fituese, gjë që sipas saj ngre dyshime për procesin e prokurimit.
“Qytetarët kanë të drejtë të pyesin pse një kompani e sapokrijuar bëhet kaq shpejt dominuese në tenderë publikë dhe kush e favorizon atë”, u shpreh ajo, duke shtuar se Çairi nuk duhet të shndërrohet në “stacion të interesave partiake”.
Në fund, ajo kërkoi transparencë të plotë për të gjitha kontratat e lidhura me këtë kompani, për kriteret e përzgjedhjes dhe ofertat e paraqitura, duke theksuar se fondet publike duhet të përdoren vetëm në interes të qytetarëve të Çair.
