Bujar Osmani: Çerdhja më e madhe në Çair, një histori suksesi që e filluam para pesë viteve
Ish-shefi i diplomacisë dhe kandidati për kryetar të Komunës së Çairit nga radhët e BDI-së (Fronti Kombëtar për Integrim), Bujar Osmani, në një videomesazh ka folur për rëndësinë e edukimit parashkollor dhe investimeve konkrete për të.
Duke iu referuar rezultateve jo të mira të testit PISA, Osmani theksoi se analiza tregoi një diferencë të madhe mes fëmijëve që kishin ndjekur edukimin parashkollor dhe atyre që nuk kishin pasur këtë mundësi.
“Kjo ka qenë arsyeja pse kam lobuar, negociuar dhe udhëhequr seancën e qeverisë që miratoi fondet për çerdhen më të madhe në Çair. Sot, ky projekt po përmbyllet dhe mbetet një prej storieve të suksesit,” u shpreh Osmani.
Ai shtoi se angazhimi për investime të tjera të ngjashme do të vazhdojë edhe në të ardhmen.
