Donacion misterioz në Komunën e Tetovës: Gati 1 milion euro, por nuk dihet pse dhe nga cili shtet?
Në buxhetin e Komunës së Tetovës është shfaqur një shumë e madhe parash që po ngre pikëpyetje të mëdha mbi transparencën institucionale, shkruan Flaka Media
Kontabilisti i njohur tetovar, Asllan Koka, publikoi të dhëna nga bilanci financiar i komunës, ku në zërin 742 – Donacione nga shtetet e huaja figuron shifra 53.716.000 denarë (rreth 873 mijë euro).
Por këtu nis dilema: sipas kryetarit të Komunës, Bilall Kasami, kjo shumë nuk ka ardhur nga një shtet, por nga një biznes privat, pronari i të cilit është me kombësi serbe.
“Po të jetë donacion privat, atëherë pse në bilanc është regjistruar si ndihmë nga shtete të huaja? Nga cili shtet është shënuar kjo shumë në dokumentet zyrtare?” – pyeti Koka.
Ai theksoi se qytetarët kanë të drejtë të dinë origjinën e saktë të këtij donacioni, sidomos kur bëhet fjalë për gati 1 milion euro.
“Qytetarët e Tetovës meritojnë transparencë dhe sqarim të plotë – jo lojëra fjalësh me miliona denarë,” – përfundoi Koka.
