Festivali i Teatrove KU’Fest 2025 në Kumanovë, shpallen më të mirët (FOTO)
Në përmbyllje të edicionit të parë të Festivalit Ballkanik të Teatrove KU’Fest, që u mbajt në Kumanovë nga 1 deri më 5 shtator 2025, juria profesionale ndau çmimet për shfaqjet dhe aktorët më të dalluar të këtij edicioni, përcjell INA.
Çmimi kryesor për shfaqjen më të mirë iu dha veprës “T’rresh a të mos rresh”, në regji të Shkumbin Istrefit, e cila u vlerësua për qasjen regjisoriale, interpretimin e aktorëve dhe për ndikimin emocional tek publiku.
Aktori Vebi Qerimi u nderua me Çmimin e Publikut, si shprehje e vlerësimit dhe duartrokitjeve që mori gjatë performancës së tij në këtë shfaqje.
Suksese të rëndësishme u shënuan edhe nga produksione të tjera pjesëmarrëse. Shfaqja “Kaligula”, në regji të Gjorgji Rizeskit dhe produksion i Teatrit të Kumanovës, fitoi çmimin për regjinë më të mirë, ndërsa aktorja Keti Doncevska Ilik u vlerësua me çmimin për rolin më të mirë dytësor femëror.
Gjithashtu, në kuadër të festivalit u prezantua edhe shfaqja “Pacienti i Dr. Frojdit”, ku aktori Adrian Aziri u shpall Aktori më i Mirë i festivalit, duke u nderuar me çmimin “Sefedin Nuredini”.
KU-Fest shënoi një ngjarje të rëndësishme kulturore për Kumanovën dhe gjithë rajonin, duke sjellë në skenë krijimtari të reja dhe bashkëpunime teatrale ndërmjet artistëve ballkanikë.(INA)
