I sanksionuari nga SHBA, Koço Angjushev paguan 1.5 milionë $ për lobim

Koço Angjushev, ish-zëvendëskryeministër për çështje ekonomike dhe biznesmen aktual, ka punësuar lobistë në vlerë prej 1.5 milionë dollarësh në përpjekje për të zbutur pasojat e sanksioneve të vendosura ndaj tij nga Shtetet e Bashkuara të Amerikës, shkruan 360 степени.

Sipas të dhënave publike, marrëveshjet me tre kompani të ndryshme lobuese janë nënshkruar gjatë dy viteve të fundit, dhe besohet se vetëm një prej tyre është ndërprerë.

Angjushev, ndaj të cilit sanksionet u vendosën në dhjetor 2023 për akuza lidhur me korrupsion, menjëherë shprehu synimin për të ankimuar vendimin dhe për të përdorur të gjitha mjetet ligjore që do të çonin në heqjen e tij nga lista. Departamenti i Shtetit Amerikan e arsyetoi vendimin duke theksuar se sanksionet tregojnë përkushtimin e SHBA-ve në luftën kundër korrupsionit, që rrezikon sigurinë publike dhe zhvillimin ekonomik.

Në përgjigje të pyetjeve të mediave, kompania e Angjushevit, “Fero Invest”, konfirmoi se procedurat e lobimit në SHBA po zhvillohen në përputhje me ligjet amerikane dhe me rregullat e Departamentit të Shtetit.

Në mars 2024, Angjushev regjistroi zyrtarisht marrëveshjen e lobimit përmes kompanisë “Research Service Bureau”, ndërsa ndër lobistët që kanë punuar për të janë përfshirë Kevin Carey, Paul Hatch, Samuel Morris dhe Oliver Sherlovsky.

Veprimet e Angjushevit për të hequr sanksionet tregojnë se lobimi në SHBA mbetet një mjet i rëndësishëm për ish dhe aktualë figura politike që përballen me masa ndëshkuese, ndonëse ligjet amerikane kërkojnë transparencë të plotë publike për këto marrëveshje.