LAMM: Qarkullimi në rrugët shtetërore është normal dhe pa pengesa

Komunikacioni në të gjitha rrugët shtetërore të vendit po zhvillohet pa pengesa dhe në kushte të mira për qarkullim, ndërsa rrugët janë të thata, njofton Lidhja Auto-Moto e Maqedonisë (LAMM).

Sipas informacioneve të fundit, intensiteti i trafikut në akset rrugore jashtë zonave urbane është mesatar. Në vendkalimet kufitare, nga ana e Maqedonisë së Veriut, nuk janë regjistruar pritje më të gjata për hyrje apo dalje nga vendi.

LAMM u bën thirrje drejtuesve të automjeteve të përshtatin shpejtësinë me kushtet e rrugës, të respektojnë sinjalistikën e trafikut dhe të vozisin me kujdes të shtuar, veçanërisht në segmentet që kalojnë nëpër lugina, gryka dhe rrjedha lumenjsh, ku ekziston rreziku i paraqitjes së rrëshqitjeve të dheut.

Kujdes i veçantë rekomandohet në akset rrugore Katllanovë–Veles, Mavrovë–Dibër–Strugë, Vinicë–Berovë dhe Koçan–Dellçevë, ku rreziku nga shembjet dhe rrëshqitjet e dheut mbetet i pranishëm.