Nis punën centrali i ri i kogjenerimit në “Shkupi Veri”, investim prej 2.5 milionë eurosh

Kompania “TESSA Energy”, e cila në vitin 2024 mori përsipër menaxhimin e ish-Ngrohtores “Shkupi Veri”, sot ka vënë në funksion centralin e ri të kogjenerimit.

Investimi fillestar kap vlerën e 2.5 milionë eurove, ndërsa dy gjeneratorët e rinj do të prodhojnë 2.1 megavat energji elektrike dhe 2.6 megavat energji termike.

Nga kompania bëjnë të ditur se ky është vetëm hapi i parë i planit për modernizimin e kapaciteteve ekzistuese. Për fazën e dytë është parashikuar një investim shtesë prej 10 milionë eurosh, me synimin që objekti të shndërrohet në një qendër moderne energjetike.

Udhëheqësi i “TESSA Energy”, Ajri Shej, tha se kompania, përveç interesit biznesor, ka marrë përsipër edhe përgjegjësinë për ruajtjen dhe modernizimin e një infrastrukture të rëndësishme energjetike.

“Për ne, këto nuk ishin vetëm vendime biznesi. Morëm përsipër një objekt shumë të rëndësishëm energjetik, por edhe një përgjegjësi për të ruajtur dhe modernizuar më tej sistemin që siguron energji termike për familjet dhe objektet e tjera në Çair dhe Butel. Por nuk u ndalëm me kaq. Edhe atëherë, kishim një vizion shumë të qartë për të modernizuar infrastrukturën ekzistuese dhe për ta transformuar atë në një qendër moderne për ngrohje dhe energji të kombinuar”, tha Shej.

Në ceremoninë e vënies në funksion të centralit mori pjesë edhe zëvendëskryeministri dhe ministri i Transportit, Aleksandar Nikolloski. Ai e vlerësoi investimin si dëshmi se kompanitë vendase mund të ndjekin trendet globale të tranzicionit të gjelbër.

“Kjo është shumë e rëndësishme, sepse kompanitë vendase tregojnë se mund të jenë në hap me trendet më të larta globale. Si Ministri e Transportit, ne do të vazhdojmë t’i mbështesim këto investime dhe t’i përfundojmë të gjitha procedurat administrative sa më shpejt të jetë e mundur, në mënyrë që të kemi edhe më shumë investime të tilla, sepse vendi ka nevojë për ekonominë e gjelbër”, tha Nikolloski.

Nikolloski tha gjithashtu se gjatë ditëve të fundit janë realizuar disa investime që, sipas tij, përfaqësojnë zhvillime të shekullit XXI, duke përmendur një park me erë dhe rindërtimin e aeroportit.

“Ndërsa disa janë kundër qendrave të të dhënave dhe duan që ne të kthehemi në shekullin e 19-të, ne po ecim përpara me guxim”, deklaroi Nikolloski.