Portalb: Qytetarët ende nuk i kanë marrë 10 mijë eurot e premtuara nga VLEN
Premtimi parazgjedhor i VLEN, 10 mijë euro për çdo qytetar, që ishte promovuar me pompozitet disa ditë para zgjedhjeve parlamentare të vitit 2024 mbetet i parealizuar deri tani, shkruan Portalb.mk.
Për të njëjtin premtim, pas hyrjes në qeveri me VMRO-DPMNE, protagonistë të VLEN u zotuan se premtimi i VLEN do jetë në planqeveritar.
As atëherë, kur u zotuan e as sot kur veç më kemi hyrë në vitin e dytë të qeverisjes së VLEN, nga ky koalicion nuk tregojnë se kur do të realizohet ky premtim.
Portalb.mk nuk ka marrë përgjigje për pyetjen “deri ku është procesi i zbatimit të masës së premtuar ekonomike” e nisur deri te Qeveria e RMV-së dhe Ministria e Mjedisit Jetësor dhe Planifikimit Hapësinor, më të cilën udhëheq zëvendëskryeministri Izet Mexhiti, i cili ishte promotori kryesor i këtij premtimi.
Të njëjtën pyetje redaksia jonë e ka dërguar edhe në Ministrinë e Ekonomisë dhe Punës.
“Si Ministri e Ekonomisë dhe Punës, po zbatojmë një sërë masash që po japin rezultate konkrete, siç është Plani Operacional i Punësimit, me të cilin kemi ofruar mundësi punësimi dhe trajnimi për mijëra qytetarë në të gjithë vendin. Paralelisht, po punojmë për të mbrojtur standardin dhe për të mbështetur ndërmarrjet e vogla dhe të mesme, si dhe zonat ekonomike dhe kapacitetet industriale në përputhje me ligjet, mundësitë buxhetore dhe interesin e qytetarëve”, thanë për Portalb.mk, nga Ministria e Ekonomisë, por pa precizuar asgjë rreth pyetjes konkrete se “deri ku është procesi i zbatimit të masës së premtuar ekonomike- 10 mijë euro për çdo qytetar”.
Ndryshe, në plan programin e VLEN, nëkapitullin e shtatë– Mirëqenia dhe Ekonomia, theksohen zotime mbi buxhet zhvillimor, pensionet, pagën minimale, shtesa prindërimi, më pak taksa për bizneset e vogla dhe tëmesme, subvencione për fermerët, por, asgjëpër premtimin “10 mijë euro për çdo qytetar”
Kujtojmë se herën e fundit kur zv/kryeministri, Izet Mexhiti e ka përmendur zotimin ka qenë 1 tetor 2024, në Daily Click në TV21 kur tha se është në plan qeveritar premtimi i VLEN-it për shpërndarjen e 49 për qind të aksioneve nga ndërmarrjet publike, respektivisht premtimi që secili qytetar të marrë nga 10.000 euro.
“Po! Po, është në plan qeveritar. E kemi biseduar me VMRO-DPMNE-në. Pajtohemi dmth që shumë ndërmarrje publike, edhe pse kanë monopol ekonomik, për shkak të korrupsionit të madh që ka ndodhur në të kaluarën, për shkak të jo qeverisjes së mirë të atyre ndërmarrjeve, janë para bankrotimit. Është ide ekonomike e VLEN-it, që të fillojmë këto t’i transformojmë, t’i shndërrojmë në shoqatë aksionare, ku një pjesë të mirë të aksioneve të shkojnë te qytetarët, të rritet kontrolla ndaj këtyre dhe do të jetë një mundësi për futjen e kapitalit dhe “know how” nga kompani prestigjioze ndërkombëtare, të cilat këto kompani para bankrotit, mund t’i shndërrojnë në kompani profitable”, pati thënë mes tjerash Mexhiti. Burimi: Portalb
