Presidentja Osmani nga Washingtoni: Kosova dhe SHBA-të do të ndërtojnë kapituj të rinj të bashkëpunimit strategjik
Presidentja e Republikës së Kosovës, Vjosa Osmani, ka zhvilluar një takim të rëndësishëm në Washington D.C. me Zëvendës Sekretarin e Shtetit, Christopher Landau, ku u diskutua për forcimin e marrëdhënieve dypalëshe dhe avancimin e partneritetit strategjik mes dy vendeve.
Në një postim në rrjetet sociale, Presidentja Osmani ka falënderuar për mikpritjen e ngrohtë dhe bisedën e hapur, duke theksuar se Kosova qëndron krah për krah me Shtetet e Bashkuara në përmbushje të një vizioni të përbashkët për të ardhmen.
“Kosova qëndron krah për krah me Shtetet e Bashkuara për të ndërtuar kapituj të rinj të bashkëpunimit strategjik, në përputhje me vizionin e fortë të Presidentit Trump,” theksoi Osmani.
Ajo shtoi se synimi i këtij partneriteti është ndërtimi i më shumë sigurisë, më shumë zhvillimi dhe më shumë mundësi për qytetarët dhe bizneset në të dyja vendet.
Takimi me zyrtarët amerikanë vjen në kohën kur Kosova synon të rrisë rolin e saj në arenën ndërkombëtare, përmes partneriteteve të forta dhe orientimit euroatlantik. (INA)
