Qeveria e Kosovës ndërpret tregtinë e energjisë me kompanitë serbe, Kurti paralajmëron masa të tjera
Qeveria e Kosovës pritet të miratojë sot tri vendime për sektorin e energjisë, ndër to edhe ndalimin e tregtimit të energjisë elektrike me kompanitë serbe. Lajmin e bëri të ditur kryeministri Albin Kurti në hapje të mbledhjes së ekzekutivit.
Sipas Kurtit, ky hap është përgjigje ndaj Serbisë, e cila ka bllokuar linjat ndërkufitare për tregtimin e energjisë. Ai paralajmëroi se masat mund të ashpërsohen nëse Beogradi nuk ndryshon qëndrim.
“Së pari, do të ndalojmë tregtimin e energjisë elektrike me kompani serbe, si masë e parë ndaj Serbisë, për bllokimin e linjave ndërkufitare për tregtim, e cila mund të përshkallëzohet në të ardhmen nëse nuk ka reflektim”, tha kryeministri.
Vendimi i dytë ka të bëjë me KEK-un, të cilit do t’i vendoset obligim publik që të sigurojë një sasi të kapaciteteve ndërkufitare për muajin dhjetor. Kurti e arsyetoi këtë me vështirësitë që po i shkakton sektorit bllokimi i linjave të interkoneksionit 400 kilovolt, por edhe me faktorë të tjerë të brendshëm e të jashtëm.
Si vendim të tretë, Qeveria do të shpallë masa emergjente në energji. Ato përfshijnë detyrimin e Ibër-Lepencit që energjinë e prodhuar ta shesë për furnizimin e shërbimit publik.