Real Madridi po tenton ta ‘heq qafe’ një lojtar shkaku i pagës së tij të majme
Real Madridi po përpiqet aktivisht të largojë David Alaban, pasi dëmtimet dhe paga e tij e lartë e kanë kthyer atë në një barrë si në aspektin financiar, ashtu edhe në atë sportiv.
Sipas Mundo Deportivo, rënia e Alabas është bërë një problem për Realin si brenda ashtu edhe jashtë fushës, me klubin që tashmë ka mbetur me një lojtar fizikisht të paqëndrueshëm që përfiton 22.5 milionë euro neto në vit, më shumë se çdo lojtar tjetër në skuadër, përveç Kylian Mbappe dhe Vinicius Junior.
Dikur i konsideruar si pasardhësi i Sergio Ramosit, Alaba pati një fillim të shkëlqyer pasi u transferua nga Bayern Munich në vitin 2021, duke ndihmuar klubin të fitojë La Ligën dhe Ligën e Kampionëve që në sezonin e tij të parë.
Megjithatë, një dëmtim i ligamenteve të kryqëzuara ndaj Villarrealit në dhjetor të vitit 2023 e rrënoi karrierën e tij.
Pas një rikuperimi prej 399 ditësh, ai u rikthye në janar të vitit 2025, vetëm për të hasur sërish probleme fizike. Ai zhvilloi vetëm 14 paraqitje sezonin e kaluar, duke e nisur titullar në vetëm pesë ndeshje.
Austriaku ka kontratë me Real Madridin deri në qershor 2026, por dëmtimi i rëndë i vitit 2023 ka ndikuar ndjeshëm në besueshmërinë e tij.
Ai arriti të luajë vetëm një ndeshje të plotë 90-minutëshe sezonin e kaluar dhe nuk ka arritur të përfundojë dy ndeshje radhazi që nga rikthimi i tij nga dëmtimi.
Reali kishte shpresuar të mbështetej te ai si një udhëheqës i prapavijës, por mungesa e tij e gjatë ka lënë një boshllëk të ndjeshëm në mbrojtje.
