Skandal në Spitalin e Prizrenit: Gjobitet me 3 mijë euro për certifikatat shëndetësore të lejeve të armëve, mungonin dosjet e kandidatëve
Sipas vendimit të 10 marsit 2026, të siguruar nga Insajderi, spitali i drejtuar nga Osman Hajdari nuk kishte arkivuar dosjet individuale të kandidatëve. Drejtori mjekësor, Shefki Xharra, kishte deklaruar se kandidatët trajtoheshin si aplikues dhe jo si pacientë, prandaj mbahej vetëm libri i regjistrit me të dhënat kryesore, ndërsa kopjet e certifikatave nuk ishin ruajtur në mënyrë sistematike, pasi gabimisht ishin konsideruar dokumente që nuk kërkonin ruajtje afatgjatë.
Inspektorët kanë evidentuar edhe mangësi të tjera, përfshirë diagnoza të paplota, rubrika të paplotësuara sipas standardeve, mungesë të të dhënave për terapinë dhe procedurat mjekësore, si dhe raste pa nënshkrimin dhe faksimilin e mjekut përgjegjës. Këto parregullsi janë vlerësuar si shkelje të Ligjit për Shëndetësi dhe udhëzimeve administrative në fuqi, për çka spitalit i është shqiptuar gjobë prej 3 mijë eurosh, me mundësi pagese të gjysmës së saj, 1 mijë e 500 euro, brenda 15 ditësh, si dhe ankimimi brenda 30 ditësh.
Ndërkaq, parregullsitë në procesin e pajisjes me leje armësh ishin bërë publike edhe në një hulumtim të “Betimi për Drejtësi”, të transmetuar më 21 shkurt 2026, ku ishin paraqitur prova për lëshimin e certifikatave shëndetësore nga Spitali i Prizrenit për kandidatët që aplikonin për leje armësh.