Takimi historik në Pekin, nga Putin, Kim Jong Un deri tek Vuçiç, ja kë ftoi Xi Jinping

Pekini ishte sot qendra e vëmendjes botërore, teksa për herë të parë në historinë moderne u panë së bashku në një dalje publike tre nga liderët më të fuqishëm dhe kontroversë të botës: presidenti i Kinës, Xi Jinping, ai i Rusisë, Vladimir Putin, dhe udhëheqësi i Koresë së Veriut, Kim Jong Un.

Të tre morën pjesë në një paradë madhështore ushtarake të mbajtur në kryeqytetin kinez, me rastin e 80-vjetorit të përfundimit të Luftës së Dytë Botërore. Organizuar nga autoritetet kineze, kjo ngjarje u pa si një demonstrim force dhe uniteti nga vendet që sfidojnë dominimin perëndimor në arenën ndërkombëtare.

Në paradë ishin të pranishëm edhe liderë të tjerë nga vende aleate të Kinës, përfshirë:

Kryeministri i Pakistanit, Shehbaz Sharif

Presidenti i Vietnamit, Luong Cuong

Presidenti i Iranit, Masoud Pezeshkian

Presidenti i Serbisë, Aleksandar Vuçiq

Presidenti i Zimbabvesë, Emmerson Mnangagwa

Presidenti i Kubës, Miguel Díaz-Canel

Kryeministri i Sllovakisë, Robert Fico

Presidenti i Bjellorusisë, Alexander Lukashenko

Në total, më shumë se 25 krerë shtetesh dhe qeverish iu bashkuan eventit, të cilët u pritën me ceremoni zyrtare dhe shtrëngime duarsh me presidentin kinez, Xi Jinping.

Një sinjal për Perëndimin?

Parada u cilësua nga analistët ndërkombëtarë si një mesazh i qartë për SHBA-në dhe aleatët e saj, në një kohë kur tensionet gjeopolitike janë të larta, veçanërisht në rajonet e Azisë dhe Evropës Lindore.

Ushtria kineze prezantoi teknologji të avancuar ushtarake, përfshirë dronë luftarakë, raketa hipersonike dhe sisteme mbrojtjeje të gjeneratës së re.

Ky bashkim i liderëve autoritarë në një skenë ndërkombëtare shihet si përpjekje për të ndërtuar një bosht të ri gjeopolitik, i cili rivalizon ndikimin e NATO-s dhe aleancave të tjera perëndimore.