Aleanca për Shqiptarët: Koha për marrëveshje të re politike mes shqiptarëve dhe maqedonasve
“Koha për barazi reale mes shqiptarëve dhe maqedonasve, respekt të ndërsjellë dhe partneritet strategjik”, tha zëdhënësja e Aleancës për Shqiptarët, Njomza Shaqiri, duke prezantuar prioritetet politike të partisë.
Ajo theksoi se zhvillimi vendor i balancuar, decentralizimi real, mbështetja për rininë dhe bizneset, si dhe mbrojtja e gjuhës, traditës dhe identitetit shqiptar janë shtyllat mbi të cilat ndërtohet programi politik i Aleancës.
“Aleanca për Shqiptarët riafirmon bindjen se shqiptarët në Maqedoninë e Veriut janë faktor vendimtar dhe shtetformues, prandaj ky rol duhet të garantohet dhe të respektohet në çdo institucion dhe nivel vendimmarrjeje”, u shpreh Shaqiri.
Sipas saj, është koha për një marrëveshje të re politike ndërmjet maqedonasve dhe shqiptarëve.
“Kjo marrëveshje duhet të bazohet mbi barazi reale, respekt të ndërsjellë dhe partneritet strategjik. Vetëm kështu mund të ndërtohet një shoqëri e qëndrueshme dhe një shtet modern, europian dhe i barabartë për të gjithë”, tha ajo.
Shaqiri theksoi se Aleanca për Shqiptarët mbetet forcë politike e qendrës së djathtë, që mbron identitetin shqiptar, gjuhën dhe traditat kombëtare, duke promovuar njëkohësisht lirinë individuale, pronësinë private, ekonominë e tregut dhe zhvillimin e qëndrueshëm.
“Prioriteti ynë është zhvillimi ekonomik vendor dhe fuqizimi i komunave përmes decentralizimit real. Mbështetja për rininë, familjet dhe bizneset vendore është në qendër të angazhimit tonë politik”, deklaroi ajo.
Shaqiri shtoi se Aleanca do të punojë edhe për përfshirjen aktive të qytetarëve në vendimmarrje dhe për bashkëpunim më të ngushtë me diasporën shqiptare, të cilën e cilësoi si “një pasuri të çmuar kombëtare dhe ekonomike”.
“Aleanca për Shqiptarët është e vendosur të jetë zëri i barazisë së vërtetë dhe garant i interesit kombëtar shqiptar”, përfundoi Shaqiri.
