Komunikacioni pa ndërprerje, por kujdes në rrugët malore – mot me diell dhe temperatura deri 37 gradë
Sot në Maqedoninë e Veriut komunikacioni zhvillohet pa ndërprerje dhe nëpër rrugë të thata, njofton Lidhja Auto-Moto e Maqedonisë (LAMM).
Nga kjo organizatë theksojnë se rruga rajonale R-1106 Nova Breznica – Makedonski Brod, përmes Parkut Nacional Jasen, më 27 gusht nga ora 05:00 do të hapet për qarkullim, sipas kushteve të përcaktuara nga MPB.
“Rekomandojmë vozitje të kujdesshme, respektimin e sinjalistikës dhe përshtatjen e shpejtësisë për shkak të rrëshqitjeve të mundshme të dheut,” thuhet në njoftim.
LAMM paralajmëron kujdes të shtuar edhe në akset Katllanovë – Veles, Mavrovë – Dibër – Strugë, Vinicë – Berovë dhe Koçan – Dellçevë, ku ekziston rrezik i rrëshqitjes së dheut në gryka dhe lugina lumenjsh.
Ndërkohë, në shumë akse të vendit vijojnë ndryshime të përkohshme të regjimit të trafikut për shkak të punimeve ndërtimore, përfshirë autostradën A1 Gradsko – Drenovë, rrugën rajonale Prilep – Manastir dhe seksionet Demir Kapi – Smokvicë. Për këto, autoritetet theksojnë se sinjalistika është e vendosur dhe shoferët duhet ta respektojnë me rigorozitet.
Sa i përket moti, Enti Hidrometeorologjik informon se dita e sotme do të jetë kryesisht me diell dhe e ngrohtë.
“Temperaturat maksimale do të lëvizin prej 30 deri 37 gradë, ndërsa në Shkup pritet deri në 37 gradë Celsius,” thuhet në parashikim.
Do të fryjë erë e dobët deri mesatare nga drejtimi jugor. Flaka Media
