Gashi: Kjo tokë duhet të jetë atdheu i të gjithëve, pa ndarje e përjashtime

Kryetari i Kuvendit, Afrim Gashi, ka organizuar një pritje solemne në Kuvend me rastin e 8 Shtatorit – Ditës së Pavarësisë së Maqedonisë së Veriut, ku ka përcjellë mesazhin e unitetit dhe përgjegjësisë së përbashkët për të ardhmen e vendit.

“Kisha nderin dhe kënaqësinë që në Kuvend të organizoj një pritje për nder të 8 Shtatorit – Dita e Pavarësisë së Republikës së Maqedonisë së Veriut. Në emrin tim personal dhe në emër të deputetëve ua urova 34 vjetorin e shtetit tonë të pavarur,” shkruan Gashi.

Në fjalën e tij të rastit, kryeparlamentari theksoi se “pavarësia nuk është dhuratë, por një amanet nga e kaluara, detyrim për të tashmen dhe udhërrëfyes për të ardhmen, që kjo tokë të jetë atdheu i të gjithë njerëzve të saj pa ndarje, pa përjashtime”.

Ai shtoi se 34-vjetori e gjen vendin në paqe, si “aleat i besueshëm i NATO-s dhe një vend kandidat i denjë për t’u bërë anëtar i plotfuqishëm i Bashkimit Europian”.

“Megjithatë, është përgjegjësi e të gjithë neve që vazhdojmë të ndërtojmë shtëpinë tonë të përbashkët,” nënvizoi Gashi, duke përcjellë mesazhin për unitet dhe bashkëjetesë.