Aksion i fortë i Doganës, zv.drejtori Dauti: Kapen migrantë të paligjshëm gjatë kontrolleve në Shkup dhe Tetovë

Nëpunësit e Doganës së Shkupit kanë zbuluar 12 migrantë të paligjshëm nga Egjipti dhe Sudani brenda vetëm një dite, gjatë kontrolleve rutinë të mallrave të deklaruara për zhdoganim importi në dy pika të ndryshme doganore. Zëvendësdrejtori i Doganave, Mustafa Dauti, ka vlerësuar efikasitetin e kontrolleve, duke deklaruar se ky është një “Aksion i fortë i Doganës: Kapen migrantë gjatë kontrollit”.
Rasti i parë u regjistrua në terminalin doganor në Tetovë, ku zyrtarët doganorë dyshuan për praninë e personave të paautorizuar përpara kontrollit të një kamioni. Pas kërkimit të asistencës nga Ministria e Punëve të Brendshme, gjatë kontrollit të hapur në hapësirën e ngarkesës u gjetën pesë migrantë. Vetëm dy orë më vonë, në terminalin doganor Shkup 3, nëpunësit identifikuan edhe shtatë migrantë të tjerë të fshehur në një tjetër dërgesë importi.
Të gjithë personat e kapur i janë dorëzuar menjëherë Ministrisë së Punëve të Brendshme për procedura të mëtejshme ligjore. Edhe pse të dhënat e fundit të agjencisë Frontex tregojnë një rënie prej 42 për qind të migracionit të paligjshëm përmes rrugës së Ballkanit Perëndimor, këto dy raste të njëpasnjëshme konfirmojnë rëndësinë e kontrolleve strikte dhe të bashkëpunimit ndërinstitucional për garantimin e sigurisë kufitare.(INA)