Gashi paralajmëron se kur do të shpallet data e zgjedhjeve lokale

Kryetari i Kuvendit, Afrim Gashi, gjatë një vizite sot në Tetovë, deklaroi para gazetarëve se zgjedhjet lokale do të shpallen në gjysmën e parë të muajit gusht, duke theksuar se ky është një afat i përcaktuar me ligj.

“Presim edhe pak për të parë nëse mund të miratojmë disa ligje dhe të mos e pengojmë funksionimin e institucioneve të tjera. Do të përpiqemi t’i shfrytëzojmë maksimalisht këto ditë dhe në afatin e përcaktuar me ligj, zgjedhjet do të shpallen – dhe kjo do të ndodhë në gjysmën e parë të gushtit”, deklaroi Gashi pas takimit me Bilall Kasami, kryetarin e Komunës së Tetovës dhe lider i Lëvizjes BESA.

Në të njëjtën konferencë, Bilall Kasami komentoi emrat e propozuar nga udhëheqësia e BDI-së për kandidatë për kryetar komune në Tetovë dhe Çair – përkatësisht Bajram Rexhepi dhe Bujar Osmani.

“Unë garantoj që kandidatët e koalicionit Vlen, kushdo që të jenë për Tetovë dhe Çair, do të jenë shumë më të mirë, do të jenë kandidatë të qytetarëve dhe për qytetarët,” tha Kasami.

Sipas tij, ndonëse Bujar Osmani është figura e dytë në parti pas Ali Ahmetit, ai nuk është kandidati që qytetarët e Tetovës e kanë pritur nga BDI dhe nga koalicioni i tyre.

“BDI ka kandidatë më të mirë, por kjo është zgjedhje e tyre. Nëse më jepet mundësia për Tetovën, sigurisht që do të kemi çfarë të ofrojmë. Qëllimi ynë është të jemi 24 orë në shërbim të qytetarëve dhe ata do të vendosin mes opsioneve që u ofrohen,” shtoi ai.

Lidhur me kandidaturën e Bujar Osmanit për Çair, Kasami tha se edhe atje BDI ka mundësi më të mira dhe se ai nuk e sheh Osmanin si kandidat të duhur.