Vazhdohet paraburgimi edhe për 2 muaj ndaj Fatmir Shehollit, i dyshuar për spiunazh
Gjykata Themelore në Prishtinë i ka vazhduar masën e paraburgimit edhe për dy muaj Fatmir Shehollit, i cili dyshohet për veprën penale të spiunazhit.
Lajmin e ka konfirmuar zëdhënësja e Gjykatës, Mirlinda Gashi, e cila ka bërë të ditur se vendimi është marrë pas kërkesës së Prokurorisë Speciale të Republikës së Kosovës.
“Pas kërkesës së Prokurorisë Speciale për vazhdimin e masës së paraburgimit ndaj të pandehurit F.SH., gjyqtari i procedurës paraprake, më 7 nëntor 2025, përmes aktvendimit ka aprovuar kërkesën, duke i vazhduar masën e paraburgimit në kohëzgjatje prej 2 (dy) muajsh,” ka deklaruar Gashi.
Sheholli ishte arrestuar më 9 tetor të këtij viti, nën dyshimin se ka kryer veprën penale të spiunazhit, ndërsa hetimet ndaj tij po vazhdojnë.
