VMRO dhe LSDM me 5 ankesa për Çashkën! Fituesi Shaqiri: S’ka parregullsi, i bëjnë në baza etnike
Pesë ankesa janë bëra në KSHZ për procesin e votimit në Komunën e Çashkës. Prej tyre katër janë dorëzuar nga VMRO-DPMNE: dy në Jabollçishtë të Epërme dhe një në Jabollçishtë të Poshtme; një ankesë në fshatin Mellnicë, ku për të njëjtën është ankuar edhe LSDM. Ankesat në procesion e votimit janë për pajisjen biometrike, edhe pse secili votues ka qenë në listë e printuar të votimit.
Kandidati i AKI-së Suat Shaqiri, i cili ka fituar garën që në rrethin e parë, ka shumë dyshime që këto ankesa janë bërë në baza etnike. Shaqiri tha për TV21 se gjatë procesit të votimit nuk ka pasur asnjë ankesë nga anëtarët e komisioneve komunale zgjedhore e as nga vëzhguesit e OSBE-ODHR. Shtoi se qytetarët kanë votuar 6 këshilltarë shqiptarë nga 11 sosh.
“Sigurisht që po pasi doli e vërteta në sipërfaqe, për çudi në të gjitha vendbanimet tjera ku gravitojnë maqedonasit qenkan të pa kontestuar, qenkan gjithçka në rregull dhe vetëm vendbanimet shqiptare u paskan manipuluar zgjedhjet! Kjo është një gënjeshtër e kulluar, një rreng institucional, prandaj i bëj thirrje organeve kompetente, institucionet më të larta dhe përfaqësuesit politik, te anëtarët e KSHZ që kjo punë të trajtohet profesionalisht dhe pa anime si rast i veçantë i vëzhgimit të situatës”, tha Shaqiri.
Nga Komisioni Shtetëror i Zgjedhjeve sot pa detaje rreth kësaj. Mbledhje kanë nesër, ku do të diskutohet edhe Çashka, ndërsa për sot thanë se deri në orën 15:00 të janë parashtruar 17 ankesa për procedurën e votimit të 19 tetorit dhe 28 ankesa për vërtetimin e rezultateve në disa komuna.
“Deri te KSHZ janë dorëzuar gjithsej 17 Kundërshtime për procedurën e votimit për vendvotime në Komunat e Dollnenit, Butelit, Vinicës, Çashkës, Krivogashtani dhe Bogdanci. Deri sa për procedurën për përmbledhjen dhe vërtetimin e rezultateve deri tani janë dorëzuar 28 Kundërshtime për komunat Shuto Orizare, Bosillovë, Prilep, Gazi Babë, Çashkë, Aerodrom, Dollneni, Haraçinë, Butel, Gostivar, Krivogashtani, dhe Bogadanci”, deklaroi Abdush Demiri, nënkryetar i KShZ-së.
Afati për parashtrimin e ankesave nga partitë politike, koalicionet dhe kandidatët e pavarur skadon deri sonte në ora 22:00. Komisioni Shtetëror i Zgjedhjeve pritet që të enjten të mbaj seancën për shqyrtimin e Kundërshtimeve, vendimet të cilat nesër do të bëhen të ditura edhe për opinioni.
