Dy ministra shpallen “persona non grata”! Sllovenia, vendi i parë evropian me sanksione ndaj Izraelit
Sllovenia është vendi i parë evropian që ka vendosur sanksione ndaj Izraelit për shkak të sulmeve në Gaza dhe vrasjeve të civilëve. Qeveria sllovene shpalli dy ministra izraelitë persona non grata, pasi ministrat e jashtëm të vendeve anëtare të Bashkimit Evropian nuk arritën konsensus për masa ndaj Izraelit për shkeljen e të drejtave të njeriut.
Bëhet fjalë për ministrin e Sigurisë Kombëtare Itamar Ben-Gvir dhe ministrin e Financave dhe Mbrojtjes Bezalel Smotrich.
Në qershor, edhe Kanadaja, Australia, Zelanda e Re, Mbretëria e Bashkuar dhe Norvegjia kishin vendosur sanksione ndaj Ben-Gvir dhe Smotrich.
“Qëndrimi i Sllovenisë është shumë i qartë: Izraeli po shkel nenin 2 të Marrëveshjes së Asocimit për sa i përket të drejtave të njeriut, si dhe të drejtën ndërkombëtare. Zbatimi i të drejtës humanitare në Gaza ka vazhduar që nga takimi i fundit i ministrave të jashtëm. Ka gjithnjë e më shumë viktima civile gjatë shpërndarjes së ushqimit. Kjo luftë e tmerrshme duhet të ndalet. Prandaj qëndrimi i Sllovenisë është shumë i qartë: Bashkimi Evropian duhet të përdorë të gjitha mjetet që ka në dispozicion për të ndaluar vazhdimin e luftës dhe vrasjet e civilëve”, tha Tanja Fajon, Ministre e Jashtme e Sllovenisë.
