Shtyrja e aktgjykimit në kohën e formimit të institucioneve, Hoxhaj sheh kalkulime nga Haga: Hashim Thaçi u mor si President
Enver Hoxhaj, nga Partia Demokratike e Kosovës, e ka parë si ‘’vendimmarrje politike’’, shtyrjen e shpalljes së aktgjykimit në çështjen ndaj Hashim Thaçit, Kadri Veselit, Rexhep Selimit dhe Jakup Krasniqit nga Specialja, i cili do të bëhet më 16 shtator, në orën 10:00.
Hoxhaj, mbrëmë i ftuar në Pressing në T7, ka thënë se këtë vendim të Speciales, ai e sheh të ‘’lidhur me procesin paszgjedhor’’ në Kosovë, duke theksuar se ai nuk ka ‘ndonjë fakt konkret’’ porse, e ka nga intuita.
‘’Ma shumë e lidhi me procesin paszgjedhor. Natyrisht, më së i bindur jam. Fakti që zoti Thaçi kur është marrë peng për të shku në gjykatë, ka qenë president, e kanë marrë prej zyrës së presidentit, dhe ka shku drejt gjykatës. Unë e shoh shtyrjen e vendimit të ndërlidhur direkt, por nuk dua që të spekuloj më shumë, sepse nuk kam ndonjë fakt konkret por intuita ime thotë që ka të bëjë puro me vendimmarrje politike.
Hoxhaj, ka deklaruar edhe se, sipas tij, gjykatat ndërkombëtare ‘’shpesh janë zgjatje e politikës ndërkombëtare’’.
‘’Mendoj që ka mund të mbyllet ky proces edhe në maj, dhe jam i bindur që ka qenë i ndërlidhun me proceset politike zgjedhore në Kosovë. Tash jam i bindun që ndërlidhet me proceset politike paszgjedhore. Por çdo gjë çka është thanë në Gjykatë, ça ka pas me u thanë është thanë. Kemi prit që gjykata nuk është instrument i politikës ndërkombëtare. Duket që edhe me mënyrën se si po shtyhet vendimmarrja, është një instrument i politikës ndërkombëtare. Gjykatat ndërkombëtare shpesh janë zgjatje e politikës ndërkombëtare, kjo po tregon një gjë të tillë. Shtyrja në fakt tregon edhe se çfarë ndodhi edhe në ditën e fundit, kur prokuroria i lexoi prentendimet e saja’’, ka thënë ai.
Pos këtyre, Hoxhaj, ka deklaruar edhe se, qëndrimi i PDK’së, ka qenë që gjykata të jap sa më shpejt vendimin në rastin e ish-krerëve të UÇK’së.
‘’Qëndrimi i jonë si PDK, ka qenë që gjykata ta jap vendimin sa më shpejt përtej asaj çfarë ndodh në Kosovë, a ka zgjedhje a s’ka, a ka institucione a s’ka, do të duhej që vendimi të jetë sa më i shpejt dhe i prerë’’, ka deklaruar Hoxhaj mes tjerash.
